राहुरी वेब प्रतिनिधी,७ मार्च २६ (शरद पाचारणे) : भारतीय जनता पार्टीचे युवा नेते अक्षय शिवाजीराव कर्डिले यांची ट्रू कॉलर अॅपच्या माध्यमातून बदनामी करण्याचा धक्कादायक प्रकार समोर आला असून या प्रकरणी राहुरी पोलिस ठाण्यात अज्ञात मोबाईल वापरकर्त्यांविरोधात गुन्हा दाखल करण्यात आला आहे.
याबाबत भारतीय जनता पार्टीचे कार्यकर्ते कुंदन पाटीलबा बाचकर (वय ३०, रा. कुटुंबे आखाडा, ता. राहुरी, जि. अहिल्यानगर) यांनी फिर्याद दिली आहे. त्यांच्या फिर्यादीत नमूद केल्याप्रमाणे, शनिवार ७ मार्च २०२६ रोजी सकाळी सुमारे आठ वाजण्याच्या सुमारास त्यांच्या मोबाईलवर एका अज्ञात क्रमांकावरून फोन आला. त्या वेळी त्यांच्या मोबाईलमधील ट्रू कॉलर अॅपवर संबंधित नंबरला युवा नेते अक्षय शिवाजीराव कर्डिले यांचे नाव आक्षेपार्ह व विकृत स्वरूपात दिसून आले.
फोन उचलल्यानंतर समोरून संगणकीय रेकॉर्डिंग आवाजात विधानसभा निवडणुकीच्या पार्श्वभूमीवर आवडत्या उमेदवाराला पसंती देण्यासाठी ‘१’ किंवा ‘२’ नंबरचे बटन दाबण्याचे सांगण्यात आले. त्यानंतर पुन्हा सकाळी ११ वाजून ३६ मिनिटांनी दुसऱ्या एका मोबाईल क्रमांकावरूनही बाचकर यांना कॉल आला. त्या वेळीही ट्रू कॉलरवर अक्षय कर्डिले यांच्याबाबत बदनामीकारक मजकूर प्रकाशित झाल्याचे त्यांच्या निदर्शनास आले.
या प्रकारामुळे कोणीतरी अज्ञात व्यक्तीने मोबाईल क्रमांकांचा वापर करून मतदारसंघातील तसेच इतर ठिकाणच्या नागरिकांना कॉल करत ट्रू कॉलरवर युवा नेते अक्षय कर्डिले यांची प्रतिमा मलिन करण्याचा प्रयत्न केल्याचा आरोप फिर्यादीत करण्यात आला आहे.
या प्रकरणी कुंदन बाचकर यांनी राहुरी पोलिस ठाण्यात तक्रार दिल्यानंतर अज्ञात मोबाईल वापरकर्त्यांविरोधात गुन्हा दाखल करण्यात आला आहे. पुढील तपास पोलीस निरीक्षक संजय ठेंगे यांच्या मार्गदर्शनाखाली राहुरी पोलिस करत आहेत.
दरम्यान, ट्रू कॉलरसारख्या डिजिटल प्लॅटफॉर्मचा वापर करून राजकीय नेत्यांची बदनामी करण्याचा प्रकार समोर आल्याने राहुरी तालुक्यात एकच खळबळ उडाली आहे.