राहुरी : सामाजिक व वैद्यकीय क्षेत्रात उल्लेखनीय कार्य करत रुग्णसेवेला प्राधान्य देणारे राहुरी शहरातील सुप्रसिद्ध लाईफ इन मल्टी स्पेशालिटी हॉस्पिटलचे संचालक तथा मॅनेजिंग डायरेक्टर डॉ. प्राजक्त हिवाळे यांची डॉ. बाबासाहेब आंबेडकर इंटरनॅशनल अवॉर्ड-२०२६ या प्रतिष्ठित पुरस्कारासाठी निवड झाली आहे. त्यांच्या रुग्णसेवा, सामाजिक बांधिलकी आणि विविध सामाजिक उपक्रमांची दखल घेत त्यांना हा आंतरराष्ट्रीय सन्मान जाहीर करण्यात आला आहे.
डॉ. प्राजक्त हिवाळे हे वैद्यकीय सेवेसोबतच सामाजिक कार्यातही सातत्याने योगदान देत आहेत. लाईफ इन मल्टी स्पेशालिटी हॉस्पिटलच्या माध्यमातून २४ तास रुग्णसेवा उपलब्ध करून देत, गरजू व सर्वसामान्य रुग्णांना दर्जेदार उपचार मिळावेत, यासाठी ते कायम तत्पर असतात. रुग्णांच्या अडचणी समजून घेत त्यांना योग्य मार्गदर्शन व उपचार मिळवून देण्यावर त्यांचा विशेष भर असतो.
२४ तास रुग्णसेवेला प्राधान्य
राहुरी शहरात अल्पावधीतच विश्वासार्ह रुग्णालय म्हणून लौकिक मिळवलेल्या लाईफ इन मल्टी स्पेशालिटी हॉस्पिटलमध्ये २४ तास वैद्यकीय सेवा, विविध तपासण्या, तज्ज्ञ डॉक्टरांचे मार्गदर्शन तसेच आवश्यक उपचार सुविधा उपलब्ध करून देण्यात आल्या आहेत. गरजू रुग्णांना शक्य तितकी मदत करण्याची भूमिका रुग्णालय प्रशासनाकडून घेतली जाते. शासनाच्या विविध आरोग्य योजनांच्या माध्यमातून पात्र रुग्णांना उपचारांचा लाभ मिळवून देण्यासाठीही रुग्णालयाकडून मार्गदर्शन केले जाते.
सामाजिक बांधिलकी जपणारे डॉक्टर
वैद्यकीय व्यवसायासोबत सामाजिक बांधिलकी जपणारे डॉ. हिवाळे यांनी आरोग्य जनजागृती, गरजू रुग्णांना मदत, आरोग्य तपासणी शिबिरे आणि विविध सामाजिक उपक्रमांमध्ये सहभाग घेतला आहे. ‘रुग्णसेवा हीच खरी समाजसेवा’ या भावनेतून काम करणाऱ्या त्यांच्या कार्याची दखल विविध स्तरांवर घेण्यात आली आहे.
तामिळनाडूत पुरस्कार सोहळा
डॉ. बाबासाहेब आंबेडकर इंटरनॅशनल अवॉर्ड-२०२६ या पुरस्कारासाठी डॉ. प्राजक्त हिवाळे यांची निवड झाल्याचे मंजुरीपत्र २३ जुलै २०२६ रोजी भारत सेंटर फॉर व्होकेशनल ट्रेनिंग, तामिळनाडू यांच्या वतीने प्रदान करण्यात आल्याचे नमूद करण्यात आले आहे. या पुरस्कारामुळे राहुरीच्या वैद्यकीय व सामाजिक क्षेत्राच्या कार्याची आंतरराष्ट्रीय पातळीवर दखल घेतली गेल्याची भावना व्यक्त होत आहे.
डॉ. प्राजक्त हिवाळे यांच्या या सन्मानाबद्दल वैद्यकीय क्षेत्रातील सहकारी, सामाजिक कार्यकर्ते, मित्रपरिवार तसेच रुग्ण व नागरिकांकडून अभिनंदनाचा वर्षाव होत असून, त्यांच्या पुढील सामाजिक व वैद्यकीय वाटचालीसाठी शुभेच्छा व्यक्त करण्यात येत आहेत.