राहुरी वेब प्रतिनिधी,५ मार्च (शरद पाचारणे) :
राहुरी तालुक्यातील कोंढवड येथे हनुमान मंदिराच्या जीर्णोद्धार व मूर्ती प्राणप्रतिष्ठानिमित्त दि. ९ ते १६ मार्च दरम्यान ज्ञानेश्वरी पारायण व अखंड हरिनाम सप्ताहाचे आयोजन करण्यात आले आहे. या धार्मिक सोहळ्यात पंचक्रोशीतील भाविक मोठ्या संख्येने सहभागी होणार आहेत.
या सप्ताहादरम्यान दररोज पहाटे ४ ते ६ या वेळेत काकडा भजन, सकाळी ६ ते ७ विष्णू सहस्त्रनाम, सकाळी ७ ते ११ ज्ञानेश्वरी पारायण, दुपारी २ ते ४ गाथा भजन, सायंकाळी ५.३० ते ६.३० हरिपाठ, त्यानंतर कीर्तन व महाप्रसादाचा कार्यक्रम होणार आहे.
कीर्तन सेवेचा कार्यक्रमही आयोजित करण्यात आला असून दि. ९ मार्च रोजी युवराज महाराज देशमुख, १० मार्च रोजी भगिरथ महाराज काळे, ११ मार्च रोजी नरेंद्र महाराज गुरव, १२ मार्च रोजी एकनाथ महाराज चत्तर, १३ मार्च रोजी जगन्नाथ महाराज पाटील आणि १४ मार्च रोजी ज्ञानसिंधू संदीपान महाराज हासेगावकर यांची कीर्तन सेवा होणार आहे.
दि. १५ मार्च रोजी दुपारी ४ वाजता ज्ञानेश्वरी ग्रंथाची मिरवणूक काढण्यात येणार असून सायंकाळी ६ वाजता स्वामी महाराज जोशीबाबा यांच्या हस्ते दीपवंदन होईल. त्यानंतर सायंकाळी ७ ते ९ या वेळेत त्यांचे कीर्तन होणार आहे.
दि. १६ मार्च रोजी सकाळी भास्करगिरी महाराज, उद्धव महाराज मंडलिक, आदिनाथ महाराज, देविदास महाराज म्हस्के, रामगिरी महाराज (येळी), अरुण महाराज पवार, अर्जुन महाराज तनपुरे, भागवत महाराज उंबरेकर, आदिनाथ महाराज दुशिंग आणि राजेश्वरगिरी महाराज यांच्या उपस्थितीत हनुमान मंदिरातील मूर्ती प्राणप्रतिष्ठा व जीर्णोद्धार सोहळा पार पडणार आहे. सायंकाळी ७ ते ९ या वेळेत उद्धव महाराज मंडलिक यांचे काल्याचे कीर्तन होऊन महाप्रसादाने सप्ताहाची सांगता होईल. कादरम्यान, कोंढवड येथे ग्रामस्थ व दानशूरांच्या सहकार्याने भव्य व आकर्षक हनुमान मंदिर उभारण्यात आले असून या मंदिराचे बांधकाम जवळपास दोन वर्षांपासून सुरू होते. या धार्मिक सोहळ्यास पंचक्रोशीतील ग्रामस्थ व भाविकांनी मोठ्या संख्येने उपस्थित राहावे, असे आवाहन कोंढवड ग्रामस्थांच्या वतीने करण्यात आले आहे.
